Startseite
 Projekte/Bilder
Mitteilungen
Termine
Wir über uns
Unser Team
Geschichte
Links, Bad Malente
Formulare
Impressum

De Lenter Gill stellt sik vör !!!

 

In’t Johr 2007 weer de Lenter Gill 60 Johr olt. Grund nooch to vertellen, wo sik datt alln’s affspeelt hett un wie de Lenter Gill so bilüttens in de Gang keem.

Datt weer 1947, as de Schoollmeister Otto Struck un de Finanzbeamter Emil Griebel doröver nodachen, wat se nich’n plattdütsch Gill in Lent bruken kunnen. Duur nich lang, dor funnen sick noch’n poor Lüüd mehr, de woll Spooß an de Sook harrn. Se weern sick gau eenig, wat de Gill de Opgaav hebben schull, de plattdütsch Modersprook to plegen, dormit se wiederleven kunn för de tokomen Generatschonen. An 12. Oktober 1947 drepen sick 81 Lenter Börger un Börgerinnen, um de Lenter Gill to grünnen. Een Vorstand wöör bestellt. De Gillnrull müß utarbeit warrn, üm de Opgaven vun de Gill fasttoleggen. 1947 wöö bi een  Gillnversammlung besloten, dat een Theatergrupp grünnt warn schull. De Tall vun de Gillnmaaten wöör jümmers grötter. 1948 harn sick al 526 Lüüd inschreven.

Mit plattdütsch Vorlesen fung de Gill an. För uns Lenter Gäst weern jüst de Theaterspeelers een groten Spaß. Se hebbt’n Barg doon för de Gill un wiss ok för de Gemeen. In de söventiger Johren keem de Sketschgrupp dorto. Af 1995 gifft dat noch wat nieges von de Gill: Plattdütsch Vertelln in’t Radio! In’t Eutiner Patientenradio weern dor’n poor vun uns Gillmaaten to höörn. Wat 1947 al besloten weer, güng 1948 loos. Mit veel Spoos un grote Leev för de plattdütsch Sprook un Oort, dor kannst op af! Twee Eenakter kemen dormals op de Bühn, un dat Speel leep goot. 1949 müssen eerstmol niege Speelers utsöcht warrn un Handwarkers. De niegen Speelers müssen ehr Rull instudeern, un de Handwaarkslüüd de Bühn trechtmoken, ok allns wat dor so tohöört.

1950 kunn de eerste Dreeakter opföhrt warrn. De Lüüd harrn ehrn Spooß un de Lust drifft das Wark, as man so seggt.

1964 hett de Gemeen denn de Freelichtbühn buut, un dor kunn nu ok speelt warrn, over opletzt güng dat in’n Kuursaal beter, un dor sünd de Theaterspeelers hüüt noch togang. 1980 weer’n Weetstried twüschen 25 Amatörbühnen ut Hamborg, Bremen, Neddersachsen un Schleswig-Holstein. De Lenter Gill kreeg denn veerten Platz. 1982 weer uns Theatergrupp sogor in Bonn, woneem se uns Gemeen un uns Land repräsenteern kunn. 1986 güng de Reis na Norderstedt, un 1989 na Wedel, 1992 geev de Lenter Gill een Gastspeel in’t Stadttheater vun Stralsund un 1994 in Güstrow. De Theatergrupp kannst di hüüt gornich mehr wegdenken, se is dat Hart vun de Lenter Gill. Over nich blots in Lent sünd se togangen, ok speelt se in Bad Schwartau, Damlos, Bordesholm, Heringsdörp bi Ollenborg, Fissau un in de Kurklinik hier in Lent.

De Speelbaas vun de Theatergrupp is Uwe Dühring. He seggt jümmers: Wat wi nu bannig bruukt, sünd junge Lüüd; de Spaas doran heppt, bi uns mittospeelen.



To allerlei Aktivitäten lad de Gill ehr Gillnmaaten in. Anfang von’t Johr steiht jümmers de Gillndach. In Sommer ward een Utflug maakt. Ok een plattdütschen Gottesdeenst steiht jedes Johr op’n Plan.

Dat plattdütsch Vorlesen, inföhrt vun Hannes Klemkow, heet hüüt „Dit un Dat op Platt“. Vun’n Harvst bit Sommer, an jeden eersten Dingsdag in Maant, in de Thomsen Kaat in Lent. Bi Kaffee un Koken warrt dor allerhand vertellt vun Land un Lüüd.

In Januar 2007 het de Gillversammlung dat erste mal in de Geschicht von die Lenter Gill een Öllerfru wählt. Gerda Flügge hett dat Amt vunn Öllermann Langfeldt övernahmen, de dat 10 Johr makt hett. Ton tweeten Öllermann is Gerd Schöning wählt worn. He hört all lang to de Gill. Beide wöllt sick för de Lenter Gill insetten un allns doför doon, dat de plattdütsch Sprool erholl‘n blifft un pleegt ward.

Een Vereen is so goot as sien Hölpslüüd, un so geiht dat ok uns Gill. Over so könnt wi wiedermaken, wat de Lenter Gill sik all för 60 Johr op de Fohnen schreeven hett:

Heeg un Pleeg vun uns plattdütsch Moderswprook !!